Regressaggressionen

Ins Heim hätt i schon längst wulln, damit i meine Leut net zur Last foll, aber wia da Regress noch aktiv war, hom die Kinda imma gsogt, na Mama wir schoffen des schon, bitte bleib daham, wir holten olle zsamm, sunst is des Haus weg, die gehen ins Grundbuach und fort is des Häuserl.

Es is imma schwieriger gworden, amol bin i deppert hergfollen, dann homs a 24 Stunden Pflege organisiert, wor eh lieab, aber aunstrengend a, für mi und für sie. Vastaunden homma beide an Schaß aber fürs Hirn is eh xund, wennst die auf wos neichs konzentrieren musst. Bis i draufkumman bin, wos sie mit „ Exerzizi, Exerzizi“ meint, hots a Zeitl dauert, aber nochdem ma dann immer turnt hoben, denk i, sie hot damit die Übungen gmeint.

Kaum hob i mi an Ane gwöhnt, is schon die Aundere kumman. Des hot mir Mut gmocht, wieder söbstständig zwerden. Seither wüll i vom Ausziagn nix mehr wissen!

Hob i guat hinkriegt, seit einiger Zeit kumm i mit da Hauskrankenpflege und ana Heimhilfe ganz gut klar.

Und dann homs den Regress obgschofft! Aber ganz komisch…..daham, für die 24 Stunden Pflege und Heimhilfe etc . zohlst weiterhin zuwi, aber wennst ins Heim gehst, is ois gratis, quasi all inklusiv!

Oh je, und des hom die Jungen dafrogt. Mehr hättst net braucht!
Af amol faungens an, …Oma, du wulltest ja früher immer ins Heim gehen, wir Kinder san zsammgsessen und haben beratschlagt, dass du in die Seniorenresistenz darfst, weil du des so gern willst, wir werden des Finanzielle schon schaffen, des soll net deine Sorge sein.

Die Enkerl san hinter der Tür gstanden: Schere, Stein, Papier, des Zimmer von der Oma ghört bold mir!

Und i hob Regressaggressionen!
Pfiat Euch!

Eure
Ermi-Oma