Des tuat ma net!

I waß net wie i´s sogen soll, aber es liegt ma holt im Mogn.

Schau, letztn´s  hom´s bei meiner Zimmerkollegin des Mittogessen wieder abserviert mit den Worten: „Bist eh schon satt, gell?“, obwohl Sie noch gar keinen Bissen gegessen hat, weil Sie alleine gar net kann.  Des tuat ma net!

Früher, wenn wir a Bamerl in Goarten pflanzt hom, homma an Pflock zuwi gschlogen, damit des Bamerl an Halt hot und sich orientieren kann.

Net zu knapp daneben, sonst werden die Wurzeln kaputt und a net zu fest zuwibunden, damit´s net dastickt. Aber a net zu weit weg vom Bamerl sonst hots kann Halt und ka Orientierung.

Heut kommt ma schon fost vor, je schiefer des Bamerl is, desto schiefer schlogens den Pflock zuwi damit des arme Bamerl net merkt dass es schief wochst, sonst kriegts gach an seelischen Schaden.

Dann steh´ns do und sogen: „Jö, schau wie schön schief des Bamerl is. So individell, so kreativ…gsetzt hommas auf unsern Grund und jetzt wochst es dem Nochboarn direkt vor´s Kuchlfenster und vadeckt die gaunze Aussicht. Na jo, do müssen die Nochbarn holt a bissl tolerant sein, gehen eh olle Sunntog in die Kirchn!

Vastehts mi net folsch.  Ka Holt, ka Orientierung! Na jo früher war der Pflock oft zu noh dabei, die gaunze Zeit homs gsogt, des muaßt und des muaßt..des wird dann „Moralinsauer“. Da Älteste hot den Hof übernehmen müssen und da Jüngste hot müssn Pforrer werden. Des is zu eng und a net richtig.

Aber des mein i net!  I mein dass es guat wär wenn Tugenden an Holt und Orientierung geben. Lob und Anerkennung sind wichtig, aber a falsches Lob is wie a schief zuwigschlogener Pflock, des Bamerl glaubt dann, es ghört so und des ziagt si daunn durch bis Verwachsen san. Schau amol hin, die Bankenmanager verzocken unser Geld und grinsen noch deppert. Die Politiker investieren in Abfangjäger statt in Bildung, Gesundheit und Friedenserziehung nur weil´s bei die Abfangjäger  fette Schmiergelder kassieren…

Do sog i: Des tuat ma net!

Eure
Ermi-Oma