Frühlingserwachen

Hiatzt is es wieder so weit, da Frühling kummt, i gfrei mi!

Die Bienen werden wieder summan- falls es noch welche gibt- die Palmkatzerl werden wieder so flauschig sein und da graue Gatsch wird durch a saftig grüne Wiesn ersetzt. I gfrei mi!

Olladings kaun bei uns im Oitasheim des Frühlinkserwachen jeden Tog sein. Also wenn di die Spätdienstschwesta am Obend beim Schlofengehn auf die rechte Seitn draht und die Nochtschwesta di nur amol umdraht, daunn wirst in da Früh links erwachen, vastehst?

Also des is daunn aber weniger klass wal wennst die holbe Nocht auf ana Seitn liegen muaßt, tuat da in da Fruah des gaunze Gstöll weh.

Aundaraseits, wenns di die gaunze Nocht hin und herdrahn wie a Ringlspül daunn wirst in da Fruah schon schwindlig munter und bist miad wal´st die gaunze Nocht net schlofen können host vua lauta umadumdrahn.

Also es is net so leicht, ausazfinden wos do die beste Lösung is. Af kann foll so wie am Kalenda, das des Frühlingserwachen genau daunn beginnt wenns am Kalenda steht. Mir warat liaba i wurat gfrogt ob in in da Fruah links oda rechts aufwochen wüll und des is a net olle Tog gleich.

Oh jo, am liebsten is mir, das i net olle Tog gleich behaundlt werd nur wals irgendwer irgendwaunn  genau so in die Pflegeangedeihungsheftln (oder wie ma zu die Mappen do sogt?) einigschrieben hot.

Also Frühlinkserwachen gerne aber nicht immer und vor allem hängt´s a  davon ob, ob i Spätrechtseinschlofen tua oda net.

Wos i sogn wüll: Frühling(k)serwachen hin oder her…. Da Frühling frogt net, der kummt afoch aber mi tuats bitte frogen und red ma´s uns afoch aus, daunn gfrei i mi a aufs Frühlinkserwachen.

Schönes Frühlingserwachen

wünscht

Eure

Ermi-Oma